Монгол Ардын Намын Удирдах зөвлөлийн 2025.01.08-ны  нэгдүгээр хуралдааны А/02 дугаар тогтоол шийдвэрийн дагуу  ирэх тавдугаар сар хүртэл орон даяар “Монгол Ардын Намын хөгжлийн стратеги AGENDA-2.0” хөтөлбөр, ”Бүтээмжийн гурван шилжилт” үндэсний хөгжлийн стратегийг намын нийт гишүүд, дэмжигчдээр хэлэлцүүлэхээр шийдвэрлэсэн. Энэхүү ажлын хүрээнд намын гишүүд, дэмжигчид,  иргэдэд УИХ-ын болон Засгийн газрын үйл ажиллагаа, батлагдсан хууль, тогтоомж бусад холбогдолтой мэдээллийг хүргэж нээлттэй хэлэлцүүлгийг зохион байгуулахаар Дорноговь аймагт Монгол Ардын Намын Ерөнхий Нарийн Бичгийн дарга Я.Содбаатараар ахлуулсан ажлын хэсэг өнөөдөр /2025.02.07/  ажиллаж байна.

Ажлын хэсгийн эхний уулзалт Дорноговь аймгийн Монгол Ардын Намын хорооны удирдах ажилтнууд, сумдын намын хорооны төлөөлөл, гишүүд дэмжигчдийн хүрээнд хөгжлийн стратеги AGENDA 2.0 танилцуулга илтгэлийг Ерөнхий Нарийн Бичгийн дарга Я.Содбаатар танилцуулснаар эхэллээ.

Түүний дараа УИХ-ын гишүүн, Зам тээврийн сайд Б.Дэлгэрсайхан УИХ, Засгийн газрын зүгээс хэрэгжүүлж буй улс орны хөгжлийн бодлого, 14 мега төсөлтэй холбоотой мэдээллийг намын гишүүдэд хүргэж ажиллалаа. 

УИХ-ын гишүүн Н.Наранбаатар, Б.Уянга, Ж.Галбадрах, Монгол Ардын Намын  Хяналтын ерөнхий хорооны дэд дарга Б.Баттүшиг, СДМЗХ-ны Ерөнхийлөгч, Намын байгуулалтын газрын дарга Б.Пүрэвдагва, Сан хөрөнгийн газрын дарга Ж.Чинболд, Технологи, инновацын газрын дарга Н.Жавхлан, Олон нийттэй харилцах төвийн захирал А.Адилбиш нар оролцож аймаг, сумдын намын хорооны гишүүдийн сонирхсон асуулт, саналыг сонсож, тодорхой шийдвэртэй хариултуудыг өгч ажиллаж байна.

1990 оноос өмнөх намын түүх, удирдагчдын намтрыг намын гишүүдэд танилцуулж сурталчлах чиглэлд Монгол Ардын Нам ажиллаж байгааг намын гишүүд дэмжиж байгаагаа илэрхийлж байлаа. Мөн шинээр хэрэгжиж байгаа Улс төрийн намын тухай хуультай холбоотой зарим чухал асуудлыг намын анхан шатны удирдлагуудын зүгээс, улсын түвшинд хийж буй улс төрийн томилгоонд Монгол Ардын Нам онцгой анхаарахыг чухалчлан хэлж байсан юм.