2021 оны арванхоёрдугаар сарын 6,7-ны өдрүүдэд МАН-ын 30 дугаар Их хурлаа хийж, Социал Демократ үзэл баримтлалтай нам болохоо зарлан тодотгосон. Мөн “Шинэ зуун-Дэвшилтэд бодлого” 5 чиглэл, 25 зүйл бүхий намын хөтөлбөрийг шинэчлэн баталсан. 30  дугаар Их хурлын тогтоол, шийдвэрийн хэрэгжилтийг хангах, дэвшүүлсэн хөтөлбөр, зорилтуудыг хэрэгжүүлэх ажлууд үе шаттайгаар амжилттай хэрэгжиж байна.

Монгол Ардын Намын Удирдах Зөвлөлийн Ажлын албанаас 30 дугаар Их хурлын тогтоол шийдвэрийг хэрэгжүүлэх, социал демократ үзэл баримтлал, Шинэ сэргэлтийн бодлогыг таниулах, хүний эрхийн орчныг сайжруулах, авлигын эсрэг дэвшилтэт бодлогыг түгээн дэлгэрүүлэх зорилгоор намын анхан шатны байгууллагуудын үйл ажиллагааг эрчимжүүлэх, намын гишүүд, дэмжигчдийг чадавхжуулах, хүний эрхийн манлайлагчдыг бэлтгэх зорилготойгоор “Шинэ зуун-дэвшилтэт бодлого”  сургалтыг зохион  байгуулж  байгаа билээ. Энэ удаад 15 аймгийн 236 суманд хүрч ажиллахаар нийтдээ 79 баг орон нутагт ажиллаж байна.

Энэ сарын 7-ноос 12-ны өдрийг дуустал үргэлжлэх энэ удаагийн сургалтын аймгийн төвүүд ажиллах багуудыг МАН-ын Удирдах зөвлөлийн Ажлын албанаас  намын Нарийн бичгийн дарга нар болон Газрын дарга нар ахлах бол сумдад хүрч ажиллах багуудыг 30 дугаар Их хурлаас сонгогдсон намын Бага хурлын гишүүд ахалж ажиллана.

МАН-ын Намын байгуулалтын газрын дарга Б.Пүрэвдагваар ахлуулсан баг өнөөдөр /2022.11.08/ Дорнод аймагт ажиллаж байна.  Сургалтын нээлтийн үйл ажиллагаанд Дорнод аймгийн Намын хорооны дэд дарга Ц.Сүхбаатар,Бүс хариуцсан зохицуулагч Б.Билгүүн Дорнод аймгаас сонгогдсон Намын Бага хурлын гишүүд, аймгийн МАН-ын хорооны гишүүд, дэмжигчид оролцлоо. Дорнод  аймгийн  сургалтыг МАН-ын Намын байгуулалтын газрын дарга нээж, намын бодлого, үйл ажиллагаа, Социал демократ үзэл баримтлал, Шинэ сэргэлтийн бодлого, Авлигын эсрэг дэвшилтэт бодлого, Цахим нам – 2.0 зэрэг намаас хийж хэрэгжүүлж буй томоохон ажлуудын талаар мэдээлэл өглөө.

Дорнод аймгийн 14 суманд таван баг бүсчлэн тойрч, сургалт, уулзалтуудаа хийх юм. Тодруулбал,  энэ сарын сарын  8, 9-ний өдрүүдэд Бага хурлын гишүүн М.Бадамсүрэн, Б.Оюунбилэг нараар  ахлуулсан  нэгдүгээр баг Хэрлэн суманд, Бага хурлын гишүүн Ж.Энхжаргал, Л.Отгонжаргал  нараар   ахлуулсан хоёрдугаар баг Баянтүмэн, Булган, Хөлөнбуйр суманд, Бага хурлын гишүүн  Ц.Сүхбаатар, А.Нансалмаа нараар  ахлуулсан  гуравдугаар баг Цагаан-Овоо, Баян-Уул, Баяндун, Сэргэлэн  суманд, Бага хурлын гишүүн Б.Энхсайханаар ахлуулсан дөрөвдүгээр баг Чойбалсан, Гурванзагал, Дашбалбар, Чулуунхороот  суманд, Бага хурлын гишүүн М.Энхтөр, Д.Араажав нараар ахлуулсан  тавдугаар баг Матад, Халхгол  суманд тус тус ажиллана. Багууд МАН-ын 30 дахь  Их хурлын тогтоол шийдвэрийг хэрэгжүүлэх, социал демократ үзэл баримтлал, Шинэ сэргэлтийн бодлогыг таниулах, хүний эрхийн орчныг сайжруулах, авлигын эсрэг дэвшилтэт бодлого зэрэг Монгол Ардын Намын зүгээс хийж хэрэгжүүлж байгаа, хийж хэрэгжүүлэхээр төлөвлөж буй ажлын талаар мэдээлэл өгч, Хүний эрх, Жендэрийн сургагч багш нарын сургалтуудыг орох юм. Мөн анхан шатны гишүүд дэмжигчдийн санал хүсэлтийг сонсоно.